Kvenfélag Garðabæjar

Það er orðinn fastur liður  í hátíðarhöldunum vegna 17. júní hjá mörgum fjölskyldum í bænum að koma í kaffi hjá Kvenfélagi Garðabæjar í Flataskóla.   Í ár var engin undantekning á því og mættu í kaffisöluna yfir 600 manns og gæddu sér á öllu því góðgæti sem þar var boðið upp á.  Félagskonur leggja sitt af mörkum til að taka sem veglegast á móti gestum sínum sem fer fjölgandi með hverju árinu.  Fjallkonan í ár var Margrét Kjærnested og blómastúlkan Unnur María Davíðsdóttir 6 ára. Kaffisalan 17. júní er stærsta fjáröflun félagsins og rennur allur ágóði til líknarmála.  Kvenfélagið vill hér með koma á framfæri þakklæti til bæjarbúa fyrir stuðninginn og góða þátttöku og vonast til að sjá sem flesta að ári.

                             Dagurinn okkar nálgast – 17. júní

Tekið verður á móti kaffimeðlæti í Flataskóla frá kl. 11:00 að morgni 17. júní. Þær konur sem hugsanlega verða fjarverandi eru beðnar um að koma meðlætinu til 17. júní nefndar, stjórnarkvenna eða vinkvenna í félaginu.  Vinsamlegast munið eftir að merkja alla diska með nafni og símanúmeri.

Margar hendur vinna létt verk þannig að ef þú ert með lausan tíma í undirbúning, frágang eða á mesta álagstímanum frá kl. 14:00 – 17:00 þá endilega hafðu samband við Gunnhildi Lýðsdóttur í síma 864-7458 til að skrá þig á þann tíma sem hentar þér og þinni vinkonu t.d.
 
Forsala að kaffihlaðborðinu hefst kl. 13:00 í Flataskóla.

Setjum nú á okkur svunturnar og mætum til leiks í Flataskóla 17. júní.  Þar mun glaðværðin ríkja og hinn góði kvenfélagsandi svífa léttilega yfir okkar samheldna hópi.
            
                                                     Með hátíðarkveðju
                                    17. júní nefndin og stjórn Kvenfélags Garðabæjar

 

 

 

Hin árlega vorferð Kvenfélags Garðabæjar var farin 15. maí sl.   Í þetta sinn var ferðinni heitið til Akraness en að venju var um óvissuferð að ræða.  Í ferðanefndinni voru þær Jóna Rún Gunnarsdóttir og Ágústa Magnúsdóttir.  Þær fengu til liðs við sig leiðsögumanninn Magnús Oddsson sem fræddi konur um hina ýmsu staði og sagði frá merkum atburðum sem snertu Akranes.  Ýmislegt tengt menningu staðarins var skoðað.  Má þar nefna málverkasýningu Matthildar Arnalds, safnið ,,Íþróttir í 100 ár" var skoðað, Akraneskirkjan heimsótt, gallerý Dýrfinnu og Stellu heimsótt og síðast en ekki síst var farið í Haraldarhús en þar tóku hjónin Ingibjörg Pálmadóttir og Haraldur Sturlaugsson höfðinglega á móti hópnum.  Ljúffengur kvöldverður var að lokum snæddur á veitingastaðnum Calido.  39 konur voru með í ferðinni og voru þær sammála um að ferðin hafi verið mjög vel heppnuð í alla staði og ferðanefndin hefði staðið sig sérlega vel.  Yfirskrift ferðarinnar var ,,Sól í hjarta" og má með sanni segja að það hafi átt vel við því sól skein í heiði allan daginn og sól var svo sannarlega í hjörtum ferðalanga þennan dag.

Sjá myndir úr ferðinni í myndasafninu