Aðalfundi 3. febrúar 2021 frestað

Garðabær 18.01.2021

Aðalfundi 3. febrúar 2021 frestað!

Stjórn óskar þér og fjölskyldu þinni gleðilegs nýs árs 2021 og vonar að þið hafið haft það gott í ykkar jólakúlu yfir jól og áramót.
Nú er nýtt ár hafið og það þýðir nýtt upphaf, við tökum vel á móti 2021.

Á tímum sem þessum er mikilvægt að við stöndum þétt saman og snúum bökum saman.

Þó með minnst tveggja metra millibili.

Öll él birta upp um síðir og á það sérstaklega vel við núna, þegar þorrinn er handan við hornið.

Það eru forréttindi að búa í landinu okkar á svona tímum, hér er fámennt og góðmennt og ekki verður betur séð annað en að allir séu að gera sitt besta.

Þetta eru svo sannarlega óvenjulegir tímar svo ekki sé meira sagt.

Við sjáum okkur ekki fært að hafa aðalfund eins og stóð til að hafa þann 3. febrúar 2021.

“Gjöf til allra kvenna” á Íslandi andvirði kr. 9.000 á hverja kvenfélagskonu hefur verið lögð inn á reikning Kvenfélagasambands Íslands okkar framlag.

Hlökkum til að sjá ykkur kæru Kvenfélagskonur vonandi fljótlega.

Við munum boða til aðalfundar um leið og hægt er.

Fegurðin

Með þér býr innri friður
fegurra en því þú veist.
Með þér býr ljósið
svo hreint og skært.
Lát það skína,
svo fleiri njóti
og vittu til það birtir upp.


Kærleikskveðja til ykkar
F.h. stjórnar Kvenfélags Garðabæjar,
S.Helena Jónasdóttir formaður

Kvenfélag Garðabæjar styrkir landssöfnun Kvenfélagasambands Íslands

Í tilefni 90 ára afmælis Kvenfélagasambands Íslands standa öll kvenfélög um allt land fyrir söfnun fyrir tækjum og búnaði sem tengir rafrænt saman ómtæki hvar sem er á landinu. Þau munu nýtast öllum konum á Íslandi, jafnt fæðandi konum sem og konum með kvensjúkdóma. Með kaupum á þessum tækjum væri hægt að óm- og tæknivæða landið og tengja það saman sem eina heild. Ómskoðanir eru snar þáttur í tengslum við skoðun kvenlíffæra, hvort sem um er að ræða á meðgöngu, fæðingu eða vegna gruns um kvensjúkdóma. Þessar skoðanir þykja sjálfsagðar og flestar konur á landinu þekkja mikilvægi þeirra. Tækin sem safnað verður fyrir geta aukið öryggi í greiningum og í mörgum tilfellum komið í veg fyrir að senda þurfi konur á milli landshluta vegna ýmissa óvissuþátta. Kvenfélag Garðabæjar mun greiða kr. 9.000 á hverja félagskonu inn í þessa landssöfnum fyrir n.k. áramót.

Fh. stjórnar Kvenfélags Garðabæjar
S. Helena Jónasóttir

Kvenfélag Garðabæjar styrkir Garðasókn

Stjórn Kvenfélags Garðabæjar ákvað að styrkja Styrktarsjóð Garðasóknar um kr. 200.000 sem rennur til þeirra, sem á þurfa að halda fyrir hátíðarnar. Afhending styrksins til Garðasóknar fór fram í Vídalínskikju þann 4. desember s.l.. fyrir framan aðventukransinn sem var einnig gjöf frá félaginu. Jóna Hrönn Bolladóttir sóknarprestur tók við gjafabréfinu af formanni félagsins S. Helenu Jónasdóttur og var varaformaður Guðrún G. Eggertsdóttir og ritari Erla Bil Bjarnadóttir viðstaddar. 

Kvenfélag Garðabæjar sendir árnaðaróskir til bæjarbúa í tilefni jólanna. 

Kvenfélagið styrkir Garðasókn 4.12.2020 lítil

Bréf frá formanni til Kvenfélagskvenna 26.11.2020

Garðabær 26.11.2020

Komið þið sælar kæru félagskonur!                                                      

Við stjórnarkonur vonum innilega að þú og fjölskylda þín hafir það sem allra best, séuð við góða heilsu og líði vel, við erum sjálfar í ágætu standi og við góða heilsu.

Þetta er búið að vera mjög sérstakur tími hjá okkur, höfum náð hingað til að halda nokkra stjórnarfundi, meðal annars um Garðaholt sem stjórnin hefur tekið við rekstri um tíma.

Vonandi fer nú staðan að lægja í ástandinu enn geisar hún um víða veröld, gleðileg frétt var þegar við heyrðu um væntanlegt bóluefni, gefur okkur von fyrr en seinna um bjartari tímar.

Nú förum við inn í aðventuna og jólaundirbúning þar sem margt er í óvissu.  Við munum þurfa að fylgja ýmsum tilmælum og sýna ábyrgð í þágu almennings.

Ákveðið er að halda ekki Kvenfélagsfund fyrr en á nýju ári, við vorum farnar að hlakka til að hafa jólafund og hitta ykkur en við fylgjum öllum reglum.

Hér nálgumst við marklínuna og verðum áfram að sýna þrautseigju og enn meira þol svo vonandi við náum að njóta dimmasta tíma ársins aðventunnar og jólahátíðar sem er á næsta leiti. Tendrum kerti og ljós í kringum okkur úti og inni er lýsir okkur og umhverfið upp þar til að daginn fer að lengja á ný, það er eitthvað að hlakka til.

Ekki getum við kvartað yfir veðrinu sem búið er að vera þokkalega gott og margir yndislegir dagar til útivistar og ekki er snjórinn sjáanlegur að neinu ráði, njótum.

Farið vel með ykkur kæru konur.

Vökvaðu kærleikans viðkvæmu rós
þá veitist þér andlegur styrkur.Mynd með dreifibréfi 26.11.2020
Kveiktu svo örlítið aðventuljós,
þá eyðist þitt skammdegis myrkur.

Að lokum bið ég ykkur að njóta aðventunnar og búa ykkur gæðastund með ykkar nánustu.

Við óskum ykkur gleðilegrar jólahátíðar og hlökkum til að hitta ykkur á nýju ári.

Fh. Stjórnar Kvenfélags Garðabæjar
S. Helena Jónasdóttir formaður